Zonunpar Chanchinbu hawnna a tan.

KA U Mala

Ka Nuin achhul ata min sanchhuah atang khan ka sakruang engkim hi siamtu duan angina ka lo pu chho ve naw naw a. Lungawi lohna leh hnapthleng sen vek khawpa thinrimna hi ka la tawng meuh lo achha chu ani e. Chutih ahnekin thiante zingah chuan a thawveng ber leh intimaksak peih ber ka la ni fan fo a. Mahse, he ka hringnun, ka naupan tet lai, sephung insiktir kan addict lai ata nupui fanau nena kan inchiah kawi a, sawrkar chhiahhlawh ka nih hnu thleng hian thil tam tak theihnghilh rualloh ka tawng ve ta nual a. Amaherawhchu ka khawlhring ngaihtuahna atanga ka paihbo theih miahloh hriatreng ka tum em em chuangloh  ka u Mala ka ngaihtuah chang ni hi atam thin. A nau ka lo ni kher kher hi vannei ka intihzia leh kan khuaah lokal sela kan nu arpui thau tha khawn thluk ka inhuamziate hi a hre tak kher awm si lova..

Ka hriat dan…………

Tunge a hming phuah a, enge an phuah chhan tih te chu ka hre lo. A pumpui capacity leh a khup lawk dante phei chu hre lo tak ka ni ringawt. Mahse hei hi chu ka chiang ve tlat….’A ni kha chu tlangval zawng zawng zing a chal ngalh ber leh kuhva eisen thei ber a ni’ tih hi. A ha hi atirah chuan a var ve ni tih hi ka puten min hrilh hlauh lo phei sela chu hrelovin vaivutah ka kir leh ngei dawn a lo ni reng si.

Pianghmun ni hauh si lo, hetiang tak mai a ka thlahlel leh u leh nau ang chiah a kan lo in en tak dan hi a mak a sin. Ka puin min hrilh dan chuan ka sentet lai, bawk vak a ka kal theih tantirh lai vel a ni ang, ka U Mala hian a mumangah Ramhuai lak ata min lo chhan chhuak a. Ramhuaiin min lakbo a tum lai tak chu huaisen tak a alo bei a, Kraws chhinchhiahna eng engemaw a siam kualin kan veng putar chhampual chham thinte a chhamkual nuaih hnuah min chhanchhuak thei ta hram a ni awm a sin. A tuk zingah chuan kan inah va kalin a mumang ropui chu tute sapram kal chanchin report aia ropui chuang hauhlo hian a theh a. A lawmna atan ka puin sa vun alo bawl sak nghe nghe an ti. Chuta tang chuan nau tak tak anga min enin nikhua ka hriat hnuah pawh ka zui ta chawt mai a ni.

Min zirtir ve thin…

Khawchhak atangin ni alo chhuaka, khawthlang lam ah atla leh thin tih hi min hrilh lo se la chuan ka hre kher lo ang a, kan khaw nula hmeltha Zosangi awm dinglama khuavang awm thu min hrilh te kha kan intihtheih pui ve thin khawp mai. Kawnga kan kal a aia upa kan tawh reng rengin kal pelh mai loh tur, biakna tur kan hre lo a nih pawhin ‘Ka pi, Ka pu, uisa I ei duh em? Kan ti tal tura ni’ tih te; Ruaitheh ni khua in aia upa bar khalh loh tur, riltam luat avang a kan lo barkhalh palh a nih pawhin kan chhak leh ngei tur ani’ tihte hi min zirtir nasat pawl leh thusawm pek tluk hial a ka zawm that chu a ni.

‘Thlasik chat mai maite chu nipuiah a reh leh mai enghelh vak tur ani lo’ tih min hrilh phei chu ka zawm tha kher a sin.Thlasik lai hi chuan ka ke chu Saphu kawr aiin a char zawk hial ang chu. Vawikhat pawh ka  u Leni’n min zahpui deuh ani ang chu, chingal tuiin min chiah sak a, nawhlungin a nawt chiah mai chu Ka u Mala hmaah ka mittui a hnam sawk thei. Hemi tum zet hi chuan a ngaihdan ani lo kher a sin, kum thum chhung ka u Leni chu biak chu sawi loh a melh pawh a melh hauh lo nia maw le. Melh luih tir an tum pawhin a maimit chhing lui tlat thin.

Mahni vengah chuan sakeibaknei ang a huai tur tih kha kan changvawn ani bawk. Vawikhat pawh Tuaitit mual naupang kan venga a pi te chawhmeh suak tur kan venga lo kal kha sakeibaknei puk luhchilh a ngaiin velh kan lo tuma, mahse a vawtuin ek kan cheh  leh si. Ka u Mala lahin min chhan atum der si lo, ka tah a chhuak kher asin. Mahse, tah chu tuai nihna tih zirtirna hnuaia seilian kha ka ni miau a, min zirtirtupa lah ka bulah a ding reng mai bawk si. Min hrilh angina chhampual chham chungin ka ha bal chu van lamah kan vawra, Pu Vana’n a ha tha in a lo thleng a ni chek ang chu ka ha hi a bal hlen bik lo ve.

Nula kan rim dun a……………

Khuangchawi thla, thla en vanglai ani ta in ka hria, zan khat chu a lung leng ngang ni tur a ni. Zan danga leng tur a min sawm ngai hlei lo kha min sawm ve mauh mai. Kei lah rawlthar a thuchang ka lo phur ve tumhrang a. Kapi vawk hriak dahthat ngei mai inthihin ka intawk pial sauh sauh a, lengtur chuan ka zui chhuak ve ta poh a. kan len tumna a sawi hi tun hma a tang a a lo tawih ve tawh a ni awm e. Kawnga kan kal laite chuan riah a tul thut thu hlaah hawsan hreh lo turin min chah ngun hle a ni.

Tichuan kan tum ram chu kan thleng ta a. Kan nula-ite sumhmunah chuan kan han ding ren rawn a, a lut hmasa duh ta hauh lo mai ‘ luh hmasak ai chuan len loh’ tih a chang thlan ta mauh mai. Bei hi a va dawng duh atak em!!!. Ka loin tawk pial ve luk lak tawh si. Haw lehna’n chuan a uiawm lutuk ringawt. Ka inti huai a Thangkurate style deuh chuan ka’n leu lut ve rawih mai a. Mahse an lo fel phian a, an chhung an rual a tute nge an inleng ber pawh hriat thiam a har khawp mai. Kan nula rim ber lah mahni tawk a inti hnawihsen neipha chin inti tak mai hi a lo ni ve bawk a. Ka u Mala ka khawngaih hnup hnup khawp mai.

An hawihhawmna a zarah reiloteah bawngzun ang tak thingpui ti a a hming an vuahte chu chu kan dawm ve mai a, hrilh a hai duh khawp mai. Riah nghal a tul chuan titu pawh leng len ar a khuang chauh tihin haw a rawt ta chuk mai a. Thuleh awm hma a haw chu tul ni a ka hriat a vangin kan haw ta vang vang a. Ka rilru chhungril takah chuan kha nula kha ka lo ngei ve em em ringawt a.

Sipai tan a tum ve………

Awllen lai a pu Vungliana chiseh lam Aizawla kalin Sipai an lak tur thu a rawn hawn a. Ka u Dara beng dar a hawlh za ni ngei tur a ni . Intlar a tum ve mauh mai. A tuk lawkah a inbuatsaihna khirhkhan chu a tan ta nghal a. Mahse, Mual pawng a tanga Pu Vanlalate in thleng pawh Four Wheel nen lo chuan a tlan thleng pha lo a chha chu ani e. Mahse, saruh ai a ruh tum nei tan chuan engmah harsa alo awm lo ni ngei tur a ni , a hun thlen dawn tak takah phei chuan Tuaitit mual nuho thingai chhekna thleng luhai miah loin a thleng thei ta hial a ni.

Mahse, ka huphurh kher mai, a tellova nukawng han zawh chhoh chu…… Chutia ka u berin sipai tan atum takah chuna ka duhsak pui viau rualin ka huphurh a, a lang a pauah chuan a tlin ve ngei ka rin thute chu  ka sawi ve luam a. Mahse. a liamnite khan ka lungleng awm ngaihna  ka hre lo chu a ni e. Kha mi ni a ka lungaihna kha eiru ho thlarau nun ai a nep a lungngaihthlak a sawi chi chu a ni hauh lo nag. Tuaitit hnah chauh ringin kha mi ni kha chu ka tum tla ve a sin.

Chutia a zuk intlar ve chu, a ni, mahni tawk atlangval zawng zing a kei ka ni inti mi zawng zawng ai a kephah nei uchuak na na na chu tlan leh fitness-ah chuan a tling hneh viau a. Mahse, an han bel chiang a, abeng achhet lo kha mak an it zawk a, a bengek chuan a beng kawtchhuah thleng vung a rawnchhuah turh mai a lo ni a. Tin, a zak khan a ma pualin rim a lo nei vet tum hrang vei nen an sipai lu ber chuan ui tak chungin a rawn hnawl ta hlauh mai a. Kei a lunglawmah a tla.. A sipai bang lo kir ni a ka lawmzia kha chu Addict piangthar nuleh pa lawmna aiin a nep kher lo ang. Lawm tak ka ni.

Thlawhna Sipaiah ……..

Chutia tunlai tawng atak a Aim in Life a tlawlh takah chuan kawng dang a dap alo tul ta, Beidawnnain  achhaih zam theih loh kha  a nih miau a vangin Khenglui bul ngaw tha zet mai chu VC-te theh ni chuang hauh loin a vat vak mai a. A tumdan chuan a kumkhatna a hmarcha hmun siam a, chumi hnuah thing anchhedawngte pawh vahvaihpui ve atum ni awm e. Tichuan sawrkar nen tang dunin Vietnam Hmarcha chi tha chu a ching ta vak mai a. Foreign thlai chi ngat ching ani bawk a, a phur surh surh khawp mai. Tichuan kumpui lingletin sadaiek a hampherh ve ta a. A tuipui bawk a, A thar hlawk ngiang mai. An in leh  acheh velah a lenloh avangin a abang bawmrang sawmpahnih zet thenawm khawvengah a sem nghe nghe a ni.

Mahse, a vanduai a kal tluang nge, a hralhna a tan a alo vau chher ve ber Pu Shubitoa chuan a leisak thei ta hauh lo mai. Chaw a tan a rin chi ni bawk si lo a mangan thlak ngei mai. Thenrual tha ten an hnem laih laih reng a, khawhar inleng zahzet chuan an lenpui ve reng a ni.  A rilru pawh a dam viau tawhah kan ngai hlawm a. Mahse a lo ni hauh lo, a beidawnna leh thinrim hrik thlakna chu Khuangchawi thlahleinga zanah kan hmu ta. Bible hrilh lawkna te pawh min ti hre chhuak rum rum a lawm le. Chhum zinga lokal tur a lokal ni a thleng ta emaw tih mai tur a chhum in thuahthip chhoh kar a, atar a zur, a puia nawi a khuh kherh kherh thawm ka hriat meuh chuan Ka u Dara hi pa namai a lo ni lo tih chiang takin a rawn tarlang chhuai chhuai mai a ni. Thelh ngaihna awm lo, tih chi ni hek lo chu a khaw nawtin kan thlir liam a, Kan khaw hmarcha kungpui Partlani meuh pawhin Ka u Dara Hmarcha Hal chu hnap tui nen a thlir liam ta nih kha..Ka khawngaih reuh khawp mai.

Beiseina thar…

Beidawnna ata beiseina thar kawleng zam riai riai chuan a nun a va han ti hlim tak em!!  A Saptawng taka ‘Change’ thlen tir ngei tumtute aw rawl a hriat meuh chuan a saiip puan hlipin a suit meih that ber nen vote thlakni chuan par a chhuang a. Vote lei leh hralh ngaisang lo em em chung khan an vote lo ang tih hlauin patlinga pumpa kha kan khaw dawhthleng chungah tukchawp tingtang tumchungin a zai nileng thak peih nia maw le..

A vanneihna a herchhuak ta a ni ange tihturin a tanlamte chuan hneh takin hlado an chham a. A Va lawm em!!!. Tunah chuan atan liau liau kawl eng tan ta niin a ngai tlat a. Amaherawhchu, contract leh therhlo ilo abeisei chhin eih chuang lo. Mahni kutkawih ngei mai dinchhuahpui ngaisang chi a nih miau avangin retheih bula tan leh dawn tih a hre tak silova. A mangan thlakteh e…

Beidawnna thuahhnih….

Sawrkar tharin a chawngchawi, mipui vawt an huina ngei mai chawivungin ngawpui chi a thiat leh ta riap riap mai a. Thenawm khawvengte’n an dal zo lo. Kan Lalpa, min tlantu meuh pawh lo chhuk sela a dal zo chuang lovang, A chhandamna hial pawh a hralh duh ang chu maw le ka u hian. Tun tumchu Nuai Khat dawn a bultan ngei tumin a pawnven a sawichhing lawk lawh tawh a, kan khaw nula hmeltha Zosangi’n rizai pawhsawih puiah sawm mahsela a benga rawngah a lut tak tak tawh lo.

Mahse, Beiseina thamral, beidawnna bul tanna lek a ni si. Nuaikhat chu sawiloh Singkhat pawh kum nga chhunga an thehchhuah taklovah chuan ka u Mala meuh pawhin Beidawnna thlazar hnuaiah beiseina neih awmzia a awm lo tih a hre ta chuang ta hle mai. Hnem turin chakna ka nei lova, theihna pawh ka nei heklo. A hmalakna  apiang thlawpturin kan veng tleirawl ho ka hmin kual vel ta ringawt a ni.

Chutiang fakauva lainatna nen lo inzui kan nih avang chuan ka ngai a. Ka pain Aizawl lama pam a rawt hnu, kan liamni thleng khan engtikah nge ka tawn leh ang tiin chhunni ka chhiar a. Engtin tak awmang maw tiin kan sulhnu chu mitthlain ka dai chiae dupreng ta mai anih hi.